Со јасен фокус на модернизација и дигитализација на туристичкиот сектор, Националната асоцијација за дојдовен туризам на Македонија (НАИТМ) и дигиталната платформа Quendoo потпишаа Меморандум за разбирање, со кој Quendoo официјално се приклучува како премиум член на Асоцијацијата. Овој чекор претставува значајно зајакнување на процесите на дигитална трансформација во индустријата и отвора нови можности за сместувачките капацитети и туристичките компании.

Како премиум член, Quendoo ќе придонесува кон активностите на НАИТМ преку воведување на современи технолошки решенија и поддршка на членовите во адаптација кон глобалните дигитални трендови. Посебен акцент ќе биде ставен на унапредување на управувањето со резервации, подобрување на онлајн присуството и зголемување на продажбата на меѓународните пазари.

Во рамките на соработката, планирано е организирање на специјализиран настан посветен на дигитализацијата во туризмот, каде членовите на НАИТМ ќе имаат можност да се запознаат со практични алатки и решенија за поефикасно работење.

Партнерството е дел од пошироката стратегија на НАИТМ за развој на одржлив и конкурентен туристички екосистем, преку поврзување на индустријата со иновативни дигитални платформи и создавање услови за современ пристап во работењето.